وحيدالله مصلح
اسدالله هارون، په ګوانتانامو کې وروستی افغان بندي دی، نوموړی دا ۱۲کاله کېږي چې امريکايانو بندي
کړی، مدافع وکيل يې وايي چې هغه بې ګناه دی، هارون د وکيل نيولو لپاره يوازې ۹۰۰ ليکونه استولي وو چې يو يې هم رسېدلی نه و.
طالبان او اسدالله هارون!
د هارون خلاصون بايد يوه ټول شموله
غوښتنه شي، هغه څه چې مهم دي، دا دي چې ايا طالبانو يې د بنديانو په لست کې کومه
يادونه کړې که نه؟ هارون بايد له تنظيمي تړاو پورته د يو داسې افغان په توګه چې د
امريکايانو د نظامي شتون مزاحم و، طالبانو ته هم يو مطلوبه قضيه وي، که طالبانو دا
نوم په خپلو لستونو کې نه وي ځای کړی، دا په دې مانا چې هغوی د ټول افغانستان او
افغانانو پر ځای يوازې د خپلو طالبانو لپاره فکر کوي، په همدې خاطر اړتيا ده چې
هغوی په دې اړه جدي غوښتنه رامنځته کړي، دا مهال د هارون د خوشې کولو لپاره تر
ټولو پياوړی غږ طالبان پورته کولی شي.
حکومتي غوښتنه!
افغان حکومت بايد د هارون د خوشې کولو لپاره خپل غږ پورته
کړي، له بده مرغه له حزب اسلامي سره د خبرو اترو او توافق وروسته افغان حکومت د
حزبي بنديانو د خلاصون په برخه کې خورا ناکام سياست درلودلی، دوی حتی له طالبانو
سره د خبرو اترو لپاره دا تجربه خورا شړېدلې او تيکه تيکه تر شا پرېښې او اوس چې
کله هم د بنديانو د ځنډ په اړه خبره کېږي نو دا حتماً ورسره ويل کېږي چې که طالب
بنديان بين الافغاني تفاهم ته پاتې کېږي نو انجام به يې همغسې وي لکه د حزب اسلامي
د بنديانو... که افغان حکومت د افغاني حاکميت او ملي ارادې خبره لري نو هغوی ته
بايد دا شرم وي چې افغان بندي لا هم بې ګناه په ګوانتانامو کې پروت دی، خو دوی يې
د خوشې کولو يو تش غږ هم نه شي پورته کولی.
د هغه ورځې په هيله چې هيڅ افغان په بهرني قيد کې پاتې نه
وي.