دا يو کوچنى مثال دى؛ نړيوالې رسنۍ تل د لويو سياستونو لپاره ذهنيت سازي کوي، تاسو څو کاله شا ته لاړشئ، د مصر د ولسمشر محمد مرسي دوره کې وګرځئ، فقط بي بي سي پښتو په کې له نظره تېره کړئ. حتى دوى په پښتو ژبه په دوامدار ډول د محمد مرسي د حکومت ضد خبرونه نشرول، تل به يې پرې انتقادي او پره دار تحليلونه درلودل... دوى اوس ولې د عبدالفتاح السيسي د کودتايي رژيم خبرونه نه رااخلي؟ هغه وخت چې ولسواکي وه، د بيان او راى ازادي وه، ريښتينى منتخب پارلمان وو، رسنۍ ازادې وې، اپوزېسيون فوق العاده فعال وو، عدليه ازاده وه او د مصر په تاريخ کې د لومړي ځل لپاره د ملت په ريښتينې ارادې او انتخاب حکومت راغلى وو؛ نو رسنيو يې پر ضد هغسې پروپاګند کاوه، خو نن چې هلته پوځ ولسواکۍ ته زندۍ واچوله، په رسنيو پابندۍ لګېدلي، ګوندونه ملغا شوي، ټاکنې په جعل او تزوير ترسره شوي، د بيان او راى پر ازاديو قدغن لګېدلى او قاضيان د پوځ په اشارو فيصلې کوي؛ نو نړيوالې رسنۍ ارامې شوي، سړې شوي، خير و خيريت دى او دوى نور هغه خبرونه نه ورکوي.